Sugatan ang isang holdaper sa shootout sa Bacoor, Cavite matapos umano itong mahuli sa akto ng mga pulis noong Diyembre 13 ng tanghali.
Sa ulat ng Region 4A police, nahuli ng patrol group ang suspek na si Chelito Gloria na tinangka umanong holdapin ang dalawang lalaking nagde-deliver ng sigarilyo sakay ng kaniyang motorsiklo sa Molino III.
Nang sitahin, pinaputukan umano ng suspek ang mga pulis kaya pinaputukan nila ang mga ito pabalik.
Tiklo ang suspek na nagtamo umano ng sugat sa tagiliran na agad namang dinala sa ospital para gamutin.
Ayon sa panayam ni Police Lieutenant Ruther Saquilayan sa GMA News, matinik umanong holdaper ng mga delivery van ng sigarilyo si Gloria.
Suspek umano siya ng 15 kaso sa Bacoor City at Imus, at may standing warrant of arrest ito sa kasong ng murder with robbery sa Caloocan City.
Sinusubukan pa ring kunan ng pahayag ang suspek.
