Isang construction worker ang nasawi matapos barilin ng kanyang kapitbahay na isang retiradong miyembro ng Philippine Navy sa Brgy. Lapidario, Trece Martires City, Cavite noong Agosto.
Kinilala ang biktima na si Marlon Velasco, 47-anyos, residente ng Brgy. Lapidario. Ang suspek ay kinilala sa alyas Ric, 59-anyos, isang retiradong sundalo ng Philippine Navy at nakatira rin sa parehong barangay.
Batay sa ulat ng pulisya, naganap ang insidente bandang alas-2:40 ng hapon. Nag-iinuman umano ang dalawa nang magkaroon ng mainitang pagtatalo kaugnay sa isang baboy na nakawala at nahuli ng pamilya ng biktima. Dahil sa matinding galit, binaril ng suspek sa ulo ang biktima gamit ang hindi pa tukoy na uri ng baril.
Isang residente sa lugar ang nakarinig ng putok at agad na nagtungo sa pinagmulan nito. Naabutan niya ang suspek na nagtatangkang takpan ng mga yero at bakal ang bangkay ng biktima upang maitago. Agad itong iniulat sa barangay at kaagad ding naipaabot sa pulisya.
Mabilis na inaresto ang suspek at kasalukuyang nakakulong. Nahaharap siya sa kasong murder habang patuloy ang imbestigasyon ng Trece Martires City Police.
