Patay ang isang MERALCO technician matapos pagbabarilin habang nagmamaneho ng kanyang van sa Barangay Salitran 3, Dasmariñas City, Cavite, nitong Miyerkules ng umaga, Agosto 27.
Ayon sa ulat ng Dasmariñas Police, galing sa District Office ang biktima at binabaybay ang Jose Abad Road nang sitahin at gitgitin ng isang pulang kotse. Sa kuha ng CCTV, makikita na nagkaroon ng saglit na usapan ang dalawang motorista bago pinaputukan ng suspek ang sasakyan ng biktima.
Naisugod pa sa ospital ang empleyado ngunit idineklara rin siyang patay kalaunan. Dalawang tama ng bala ang tumama sa van ng biktima habang isang basyo ng bala ang narekober sa pinangyarihan.
Sinabi ng Dasmariñas Police na posibleng road rage ang dahilan ng insidente. Mayroon na silang tinutukoy na person of interest na umano’y isang VIP bodyguard ng politiko sa lungsod.
Samantala, mariing kinondena ng MERALCO ang pamamaril at nagpaabot ng pakikiramay sa pamilya ng kanilang empleyado na nakapagsilbi ng mahigit 21 taon sa kumpanya.
