Tinatayang nasa 2,506 Bacooreño na kabilang sa priority groups na A1, A2, at A3 ang nabakunahan sa lungsod ng Bacoor noong Mayo 17 sa loob lamang ng isang araw.
Ginaganap ang pagbabakuna sa iba’t ibang vaccination site ng naturang lungsod gaya na lamang ng Niog Elementary School, Aniban Elementary School, Alima Elementary School, Springville, Molino III Bacoor Coliseum at Queens Row Central Elementary School.
Ayon sa isang Facebook post ng City Government of Bacoor, nabakunahan na ang 540 katao sa Alima Vaccination hub, 479 sa Molino vaccination site, 528 sa Niog Elementary School, 480 sa Aniban vaccination hub, at 479 naman sa Queen’s Row vaccination site.
Nito lamang Mayo binuksan ng pamahalaang lungsod ng Bacoor ang Niog Elementary School bilang isang vaccination center.
Layon nito na mas marami pa ang mabakunahan na mga residente ng Bacoor kung sakaling may mga darating pang bakuna sa bansa.
