Nahuli ng Philippine Coast Guard (PCG) Station Cavite ang limang maliliit na bangkang ilegal na nanghuhuli ng isda sa katubigan ng Kayokno at Paniman sa Ternate, Cavite noong Agosto 20 ng gabi.
Lulan ng mga bangkang ito ang 31 kataong lumabag sa Municipal Ordinance 2, Series of 2011 na pumalaot ng walang lisensya at mangisda gamit ang air compressors.
Noon pa man, mahigpit nang ipinagbabawal ang paggamit ng air compressor dahil sa malaking kasiraan nito sa coral reefs na pinaninirahan ng maliliit na isda.
Kinumpiska naman ng PCG Cavite ang mga fishing gears maging ang mga kagamitan sa pangingisda.
“[These gears were] properly accounted for pending filing of appropriate charges,” ani ng PCG sa kanilang Facebook post.
Samantala, patuloy pa rin ang pagbabantay ng PCG Station Cavite katuwang ang Coast Guard Intelligence Unit Cavite maging Coast Guard Sub-Station Ternate at Maragondon sa pagpapatrol upang sugpuin ang ilegal na pangingisda sa karagatan ng Cavite.
