Mahigpit na ipinagbabawal ng Commission on Elections (Comelec) ang presensya ng mga politiko o kandidato sa pamamahagi ng ayuda sa panahon ng election ban, kahit na pinayagan ang patuloy na implementasyon ng mga social welfare programs tulad ng 4Ps, AKAP, at Assistance to Individuals in Crisis Situations (AICS).
Ayon kay Comelec Chairman George Garcia, layunin ng patakarang ito na maiwasan ang paggamit ng pamamahagi ng ayuda bilang plataporma ng pangangampanya ng mga tumatakbong kandidato. Aniya, bahagi ito ng pag-apruba sa kahilingan ni Department of Social Welfare and Development (DSWD) Secretary Rex Gatchalian na ipagpatuloy ang 28 programa ng ahensya sa kabila ng Comelec Resolution 11060.
Ang naturang resolusyon ay nagbabawal sa paggastos ng pondo ng gobyerno mula Marso 28 hanggang Mayo 11 bilang bahagi ng election ban. Kaugnay nito, muling ipinaalala ng Comelec na bawal ang distribusyon ng AICS mula Mayo 2 hanggang Mayo 12, maliban na lamang sa mga tulong para sa pangunahing pangangailangan gaya ng pagkain, transportasyon, medikal, edukasyon, at libing.
Binigyang-diin ni Garcia na kailangang sundin ng DSWD ang mga itinakdang alituntunin upang masiguro ang patas na implementasyon ng kanilang mga programa.
Sa ilalim ng ganitong hakbang, layunin ng Comelec na mapanatili ang integridad ng eleksyon at matiyak na walang magaganap na pang-aabuso sa paggamit ng ayuda para sa pansariling interes ng mga kandidato.
Photo 1 – Remate Online/Website
