Naaresto ng mga pulis sa Pasay City ang isang lalaking wanted sa Cavite dahil sa maramihang kaso ng acts of lasciviousness at paglabag sa Special Protection of Children Against Abuse, Exploitation, and Discrimination Act na kinasasangkutan ng mga menor de edad.
Ayon kay Pasay City Police Chief Col. Joselito De Sesto, natunton at nadakip ang suspek sa Tramo Street, Barangay 46, Pasay City sa bisa ng mga warrant of arrest na inilabas ng mga korte sa Trece Martires City, Cavite.
Batay sa ulat, may kabuuang 14 na kaso ng kahalayan ang isinampa laban sa suspek. Ang bawat kaso ay may kaukulang piyansang mula P180,000 hanggang P440,000.
Isinagawa ang operasyon sa pangunguna ng Pasay City Police Intelligence Section sa pakikipagtulungan ng Cavite Police Provincial Office bilang bahagi ng pinaigting na kampanya laban sa mga wanted na personalidad sa rehiyon.
Dinala na ang suspek sa Trece Martires City Police Station para sa kaukulang aksyon at pagsasampa ng karagdagang kaso.
