Isinusulong ni Cavite 1st District Representative Jolo Revilla sa pagdinig ng House Committee on Higher and Technical Education ang House Bill No. 1328. Layunin nito na gawing regular campus ang Cavite State University (CvSU) – Cavite City mula sa kasalukuyan nitong pagiging satellite campus.
Binigyang-diin ni Revilla na halos 25 taon nang nagsisilbing haligi ng edukasyon ang CvSU-Cavite City, ang kauna-unahang satellite campus ng unibersidad. Aniya, oras na upang mabigyan ito ng mas malaking pondo para sa pasilidad at programang de-kalidad na makikinabang ang mahigit 3,000 mag-aaral.
Sa pamamagitan ng panukalang ito, makapaghahanda ang unibersidad ng karagdagang pasilidad at mas maayos na programang akademiko na magbubukas ng mas maraming oportunidad para sa kabataan. “Ang edukasyon ay hindi pribilehiyo kundi karapatan ng bawat Pilipino,” pahayag ni Revilla sa pagdinig.
Patuloy umanong isusulong ng mambabatas ang mga hakbang na magpapalawak sa access ng mga estudyante sa de-kalidad na edukasyon, bilang tugon sa pangangailangan ng mas maraming mag-aaral hindi lamang sa Cavite City kundi sa buong lalawigan.
