Hindi pabor ang Commission on Elections (COMELEC) sa pagsasagawa ng Oplan Katok ng PNP sa panahon ng halalan. Ayon kay COMELEC Chairman George Erwin Garcia, maaaring magdulot ito ng paglabag sa karapatang pantao at mga posibleng abuso.
“Kapag ikaw ay binangga ng ganitong operasyon, at may bantang mase-search ka nang walang search warrant o ikaw ay maaresto nang walang warrant of arrest, hindi ba’t ito ay isang paglabag sa ating Saligang Batas? Hindi po dapat gawing dahilan ang halalan o paghahanda sa halalan upang ma-violate ang mga karapatan ng ating mga mamamayan,” ani Garcia sa isang panayam.
Nilinaw ng Chairman na hindi aprubado ng COMELEC ang operasyon, lalo na at umiiral ang election gun ban. Pinalakas niya ang kanyang paninindigan na mahalaga ang patas na oportunidad at kaayusan tuwing panahon ng halalan, kaya’t walang dahilan upang ituloy ang Oplan Katok sa kabila ng mga regulasyong umiiral.
Samantala, ipinaliwanag ni Brigadier General Jean Fajardo ng PNP na ang Oplan Katok ay nakatutok lamang sa mga may-ari ng baril na may expired ng lisensiya.
Sa ilalim ng programang ito, nagsasagawa ang mga pulis ng mga pagbisita sa mga tahanan upang ipaalam sa mga may-ari ng baril na expired na ang kanilang mga lisensya, at hikayatin silang mag-renew. Kasabay nito, inaanyayahan silang isumite ang kanilang mga hindi rehistradong baril para sa pansamantalang pangangalaga.
Ayon sa datos ng PNP, mahigit 621,000 licensed gun holders na ang nakatanggap ng notisya mula sa ahensiya, at higit 300,000 mga baril na hindi na-irehistro o hindi na-ayon sa mga regulasyon ang na-revoke na.
Photo 1- Philippine News Agency
