Kinumpirma ng Department of Health (DOH) na ang Pilipinas ang may pinakamabilis na pagtaas ng kaso ng Human Immunodeficiency Virus (HIV) sa buong mundo, ayon kay DOH Secretary Ted Herbosa.
Ayon sa kalihim, araw-araw ay may 57 bagong kaso ng HIV na naitatala sa bansa, at karamihan dito ay mga kabataan na nasa edad 15 hanggang 25. Sa ulat ng DOH, ang pinakabatang naitalang kaso kamakailan ay isang 12-anyos na bata mula sa Palawan.
“Our biggest problem isn’t monkeypox but the spread of HIV. We’ve seen a 500% increase in HIV cases. In fact, the youngest person we’ve diagnosed is a 12-year-old from the province of Palawan,” pahayag ni Herbosa sa isang panayam.
Sa gitna ng mabilis na paglobo ng kaso, inirekomenda ng DOH na ideklara ang HIV bilang isang national public health emergency. Nagsumite na si Secretary Herbosa ng pormal na kahilingan kay Pangulong Ferdinand Marcos Jr. upang agad na matugunan ang sitwasyon.
Batay sa pinakabagong datos, nasa 148,831 ang kabuuang bilang ng HIV cases sa bansa. Pinangangambahan ng DOH na maaaring umabot sa 400,000 ang kabuuang bilang ng mga Pilipinong posibleng mahawa kung hindi agad makakilos ang pamahalaan at publiko.
Bagama’t seryoso ang banta, nilinaw ng DOH na may lunas na para sa HIV kung maaagapan. Sa pamamagitan ng anti-retroviral therapy (ART), maaaring mamuhay nang normal ang mga pasyenteng positibo sa virus.
Hinikayat ng DOH ang publiko, lalo na ang kabataan, na maging bukas sa tamang kaalaman tungkol sa HIV at magpasuri kung kinakailangan. Libre ang HIV testing sa ilang pampublikong ospital at walk-in clinics.
