Kasunod ng proklamasyon ng Kongreso, naghahanda na si Vice President-elect Sara Duterte-Carpio para sa inaasahang pulong kasama ang kaniyang papalitang si Vice President Leni Robredo.
Nitong Huwebes, sinabi ni Duterte-Carpio na tatapusin muna ng kaniyang kampo ang transition para sa Office of the Vice President bago ang kaniyang inagurasyon.
“We are set to release a letter today [May 26] or tomorrow to Vice President Leni Robredo signed by me requesting for an initial meeting,” wika ni Duterte-Carpio.
Ayon naman kay Atty. Barry Gutierrez, tagapagsalita ni Robredo, inihahanda na rin nila ang mga kinakailangan para sa magaganap na turnover.
Samantala, tuloy ang balak na inagurasyon ni Duterte-Carpio sa Davao City sa Hunyo 19, ngunit hindi pa rin malinaw kung saan siya mag-oopisina.
Nauna na ring naanunsyo na magsisilbing kalihim ng Department of Education si Duterte-Carpio sa ilalim ng administrasyon ni President-elect Ferdinand “Bongbong” Marcos Jr.
Ani Duterte-Carpio, makikipag-usap pa siya kay Marcos Jr. kung aling programa sa edukasyon ang nais nitong gawin o ipagpatuloy, at handa umano naman siyang makipagtulungan sa mga kinauukulan – kaalyado man o hindi.
Thumbnail photo from Mayor Inday Sara Duterte FB page
