Opisyal nang itinurnover ni Congressman Jolo Revilla at Secretary of Health Teodoro Herbosa ang Cavite City MeDCare Mega Health Center sa Barangay 28 (Sea Breeze) nitong Biyernes, Marso 23.
May 100 bed capacity ito, kasama ang pharmacy at emergency facility, na tutugon sa pangangailangan pangkalusugan ng mga Caviteño.
Kasalukuyang inaayos ang license to operate ng health center para agarang makapagpapagamot na ang mga residente ng Cavite rito.
“Ang nalalapit na pagbubukas sa publiko ng Mega Heath Center na ito ay katuparan po ng ating pangako noong panahon ng kampanya na magkaroon ng bagong pampublikong ospital ang ating distrito na magpapabuti sa kalidad ng serbisyong publiko at tutugon sa mga pangangailangang medikal ng ating mga kababayan,” saad ni Cong. Jolo Revilla sa kanyang Facebook post.
“Asahan ninyo pong patuloy nating pagsusumikapang lumikha pa ng mga programa at proyekto na inyong mapakikinabangan, dahil basta Alagang Revilla ay ramdam na ramdam ng bawat isa sa ating distrito,” dagdag pa niya.
