Nanawagan si Pangulong Ferdinand Marcos Jr. sa mga alkalde na unahin ang paglilingkod sa publiko sa kabila ng papalapit na kampanya para sa 2025 midterm elections.
“Isama natin ang mga pribadong sektor upang mapalawak ang serbisyong maibibigay natin sa taumbayan. Gamitin natin ito upang maipatupad ang mahahalagang proyekto sa bawat lokalidad, lalo na ang may kinalaman sa imprastruktura at digitalisasyon,” ayon sa Pangulo.
Sa pagtitipon ng League of Municipalities of the Philippines, binigyang-diin niya na sa kabila ng matinding labanan sa politika, dapat manatiling nakatuon ang mga alkalde sa kapakanan ng mamamayan. Hinimok din niya ang pagkakaisa matapos ang halalan para sa pagpapatuloy ng nation-building.
Pinayuhan din ng Pangulo ang mga alkalde na mamuhunan sa pangmatagalang imprastruktura na magpapakinabangan hindi lamang ng kasalukuyang henerasyon kundi pati na rin ng mga susunod na salinlahi.
Matatandaang magsisimula sa Marso 28, 2025 ang panahon ng kampanya para sa mga tumatakbo sa lokal na posisyon, kabilang ang mga kandidato sa House of Representatives, gobernador, at alkalde.
Photo 1-BBM/FB
