Sa kulungan ang bagsak ng isang sundalo na nag-absence without Leave (AWOL) matapos niyang holdapin ang isang sanglaan sa Brgy. San Gabriel sa General Mariano Alvarez, Cavite nitong Miyerkules, Enero 11, ng tanghali.
Kinilala ng GMA police ang suspek bilang si Michael P. Comutohan, 47 taong gulang na napag-alamang dating miyembro ng Philippine Army.
Nasapul sa kuha ng CCTV ang pagtutok ng suspek ng baril sa kahera at saka nagdeklara ng holdap.
Natangay niya ang P16,000 cash at isang cellphone mula sa sanglaan.
Photo courtesy of GMA MPS
Agad na tumakas na parang walang nangyari ang suspek matapos ang krimen habang nagtago naman sa ilalim ng lamesa ang kahera dahil sa takot.
Sa ikinasang hot pursuit operation ng pulisya matapos magsagawa ng backtracking sa kuha ng CCTV, natunton ang suspek sa bahay ng kaniyang tiyuhin sa Brgy. Olaes kung saan siya inaresto.
Photos courtesy of GMA MPS
Bukod sa ninakaw na pera at cellphone, narekober din mula sa suspek ang caliber .40 na baril na ginamit sa paghoholdap.
Nakumpiska rin umano sa suspek ang isang granada, dalawang magazine na naglalaman ng mga bala ng baril, at tatlong mga sachet ng hinihinalang shabu batay sa ulat ng pulisya.
Nahaharap sa patong-patong na kaso ang suspek kabilang ang robbery, illegal possession of firearms and explosives at paglabag ng Comprehensive Dangerous Drugs Act.
Thumbnail photo courtesy of GMA MPS
