Patuloy na nananatiling banta sa kaligtasan ng publiko ang mga isda at shellfish mula sa baybaying dagat ng Cavite, ayon sa pinakabagong bulletin na inilabas ng Bureau of Fisheries and Aquatic Resources (BFAR).
Ang mga nahuhuling isda at shellfish mula Bacoor City hanggang Maragondon ay hindi pa rin ligtas kainin matapos matukoy ang presensya ng langis at iba pang mapanganib na kemikal sa mga ito.
Ang nasabing oil spill ay dulot ng paglubog ng MT Terranova, isang oil tanker na lumubog sa karagatan ng Bataan noong kasagsagan ng Bagyong Carina.
May karga itong 1,400 toneladang langis, na hanggang sa kasalukuyan ay hindi pa tuluyang nahihigop mula sa dagat, nagdudulot ng matinding polusyon sa karagatan at panganib sa kalusugan ng mga residente sa paligid.
Ayon sa BFAR, bagama’t ligtas ang mga isda mula sa iba pang bahagi ng Manila Bay, gaya ng Navotas, Maynila, Parañaque, at Las Piñas, ang mga isda at shellfish mula sa Cavite ay nananatiling kontaminado ng langis, grasa, at polycyclic aromatic hydrocarbons.
Ang mga contaminant na ito ay posibleng magdulot ng kanser at iba pang malubhang sakit kung makokonsumo ng tao, kaya’t mahigpit na ipinagbabawal ang panghuhuli at pagbebenta ng mga isda mula sa nasabing lugar.
Mga mangingisda, lubos na apektado
Kasabay ng banta sa kalusugan, labis ding naaapektuhan ang kabuhayan ng mga mangingisda sa Cavite, na hanggang ngayon ay hindi pa makabalik sa kanilang hanapbuhay.
Sa isang pagdinig na pinangunahan ng Senate Committee on Environment, Natural Resources and Climate Change, tinanong ni Senator Francis Tolentino ang mga opisyal ng BFAR kung kailan posibleng payagan ang mga mangingisda na bumalik sa dagat. Ngunit ayon kay Atty. Angel Encarnacion ng BFAR, patuloy pa rin ang kanilang isinasagawang monitoring at pagsusuri, at sa ngayon ay hindi pa maibibigay ang eksaktong petsa ng kanilang pagbabalik.
Batay sa mga pinakahuling pagsusuri, mayroon pa ring bakas ng langis sa karagatan ng Cavite, na nagiging hadlang para sa kaligtasan ng pangingisda.
Ayon sa BFAR, kailangan pang hintayin ang resulta ng masusing pagsusuri mula sa laboratoryo upang matiyak na ligtas nang bumalik sa dagat ang mga mangingisda. Hanggang sa maalis ang kontaminasyon, mananatili ang restriksyon sa pangisdaan.
Ang sitwasyon ng mga mangingisda ay lalo pang pinalala ng kakulangan sa mapagkukunan ng kita, kaya’t ang marami sa kanila ay umaasa na lamang sa tulong mula sa gobyerno at mga non-government organizations.
Ayon sa mga mangingisda, malaki ang epekto ng oil spill sa kanilang kabuhayan, at maraming pamilya ang nagugutom at nahihirapan sa gitna ng sitwasyong ito.
Panawagan ni Senador Revilla sa may-ari ng MT Terra Nova
Samantala, nanawagan si Senador Ramon Bong Revilla, Jr. na panagutin ang may-ari ng MT Terra Nova oil tanker na nagdulot ng malawakang pinsala sa kalikasan at kabuhayan ng mga mangingisda sa Cavite.
Ayon kay Revilla, kinakailangang magbayad ng kompensasyon ang may-ari para sa environmental damages at suportahan ang paglilinis ng oil spill sa karagatan.
“Bagama’t walang may gustong mangyari ang insidente, may responsibilidad ang may-ari ng barko na tugunan ang pinsalang dulot nito. Dapat silang managot at tumulong sa mga mangingisda na nawalan ng kabuhayan,” ani Revilla.
Sinabi rin niya na dapat magmula sa insurance ng may-ari ang gagamiting pondo para sa kompensasyon at paglilinis ng oil spill.
Apektado ang walong bayan sa Cavite, kabilang ang Bacoor, Kawit, Noveleta, Rosario, Tanza, Naic, Maragondon, at Ternate, na lahat ay nagdeklara na ng state of calamity.
Pagpapanumbalik ng kaligtasan at kalinisan ng karagatan
Sa kabila ng patuloy na problema, aktibo pa rin ang iba’t ibang ahensya ng pamahalaan sa kanilang pagsisikap na malinis ang kontaminadong dagat at maprotektahan ang marine ecosystem.
Ang BFAR, sa pakikipagtulungan ng Department of Environment and Natural Resources, ay patuloy na nagsasagawa ng mga hakbang upang tuluyang maalis ang langis sa karagatan.
Patuloy din ang kanilang koordinasyon sa mga lokal na pamahalaan upang tiyakin na ang mga hakbang ay isinasagawa alinsunod sa mga pamantayan ng kaligtasan at kalusugan.
Habang naghihintay ng mga susunod na hakbang, pinapaalalahanan ng mga awtoridad ang mga residente ng Cavite na maging maingat at huwag munang bumili o kumain ng mga produktong mula sa dagat hangga’t hindi nagbibigay ng go-signal ang BFAR.
Thumbnail photo courtesy of Canva
