Nagbabala ang Philippine Atmospheric, Geophysical and Astronomical Services Administration (PAGASA) noong Abril 14, 2025 na inaasahang aabot sa 44°C ang heat index sa lalawigan ng Cavite noong araw na iyon, na nasa ilalim ng “danger level” ayon sa pamantayan ng ahensya.
Nauna rito, umabot pa sa 47°C ang naitalang heat index noong Linggo ng Palaspas, Abril 13, sa Sangley Point, Cavite City, batay sa ulat ng PAGASA. Babala ng mga eksperto, posibleng makaranas ng heat cramps, heat exhaustion, at heat stroke ang mga taong matagal na nalalantad sa matinding init.
Patuloy na pinapayuhan ang publiko na manatiling hydrated, umiwas sa labis na pagkabilad sa araw (lalo na sa katanghaliang tapat), at limitahan ang mabibigat na aktibidad sa labas sa gitna ng matinding init.
Samantala, noong Abril 14, inulat ng PAGASA na higit sa 55 lokalidad sa buong bansa ang inaasahang nakaranas ng heat index na 40°C o higit pa.
Inasahan din na lalo pang uminit ang panahon noong nagdaang Semana Santa (Abril 13-19), kaya’t muling pinapaalalahanan ang publiko na mag-ingat at sumunod sa mga safety measure upang makaiwas sa masamang epekto ng matinding init.
Patuloy na pinapayuhan ng PAGASA ang lahat na manatiling mapagmatyag sa mga abiso at rekomendasyon ng mga awtoridad ukol sa kasalukuyang mainit na panahon.
