Inilunsad ng Philippine Statistics Authority (PSA) ang online viewing service para sa mga birth, marriage, at death certificates, kabilang ang Certificate of No Marriage (CENOMAR) at CENODEATH.
Layunin ng bagong serbisyo na gawing mas mabilis at maginhawa ang pag-access sa mga dokumento na karaniwang kailangan sa eskuwela, trabaho, at iba pang transaksyon.
Ayon sa PSA, kailangang mag-apply sa PSA Serbilis website at magbayad sa pinakamalapit na Civil Registry System (CRS) outlet. Narito ang mga bayarin:
- P130 para sa birth, marriage, at death certificates
- P185 naman para sa CENOMAR at CENODEATH
Para sa death certificate, tanging pinakamalapit na kamag-anak ng yumao ang maaaring mag-request at magbayad.
Pagkatapos magbayad, makatatanggap ang aplikante ng unique code na gagamitin para ma-access online ang dokumento. Paalala ng PSA, viewing copy lamang ang makikita online at hindi ito maaaring gamitin bilang opisyal na dokumento.
Para sa printed copies, may dalawang opsyon ang publiko:
- Ipa-deliver ang dokumento sa kanilang tirahan
- Gamitin ang DocPrint service sa alinmang PSA CRS outlet sa buong bansa.
Ayon sa PSA, inaasahang makatutulong ang proyektong ito sa publiko, lalo na sa mga estudyante na madalas na nangangailangan ng birth certificate para sa enrollment at aplikasyon sa scholarship.
