Magbibigay ng P500,000 pabuya si Cavite 1st District Rep. Jolo Revilla para sa makakapagturo sa mga suspek sa pagpatay sa isang kakandito umano sanang konsehal sa bayan ng Kawit.
“Ako ay personal na magbibigay ng LIMANDAANG LIBONG PISO (P500,000) sa makakapagsabi o makakapagturo sa mga SUSPECTS ng walang awang pagpatay kay Papi,” pahayag ni Revilla.
Ayon sa mga awtoridad, binaril ng dalawang pinaghihinalaang “riding-in-tandem” ang biktima sa tahanan nito.
“Si Jholo ‘Papi’ Granados ay kilalang mabait at matulungin na kababayan sa kanyang barangay at sa bayan ng Kawit. Siya ay naka-line up na kumandidato bilang Konsehal sa paparating na Halalan 2025 sa susunod na taon sa ilalim ng ating partido sa Unang Distrito,” ayon pa kay Revilla.
“Ang ating partido at ang aming pamilya ay lubos na nakikiramay sa mga mahal sa buhay na naiwan ni Papi. Hindi tayo titigil hangga’t hindi natin nabibigyan ng hustisya ang kanyang pagkawala,” wika ng Congressman.
