Walang naganap na insidente sa bayan ng Kawit sa mismong araw ng Barangay at Sangguniang Kabataan Elections (BSKE), ayon sa mga awtoridad.
Sa isang Facebook post, nagpasalamat si Mayor Angelo Aguinaldo sa mga Kawiteño kaugnay nang mapayapa at maayos na eleksyon.
“Una, hayaan po ninyong pasalamatan ko kayo sa mapayapa at maayos na Barangay elections nitong Lunes. Patunay po ito na mataas na ang kamalayan natin sa pagpili ng mga lingkod bayan sa mahal nating Kawit,” ani Aguinaldo.
Nagpaabot din ang alkalde ng pagbati sa mga nagwagi sa nasabing eleksyon.
“Binabati ko po ang mga napili ninyo upang ipagpatuloy ang paghahatid ng tunay na Puso at Malasakit sa mga barangay natin, mula sa Kapitan hanggang sa pinakahuling Kagawad ng Sangguniang Kabataan, kayo ang mga unang tagapagtanggol ng tunay at ganap na paninilbihan sa mga taong humahanap ng pag-asa,” aniya.
“Lubos kong inaasahan na kayo ay makatuwang namin kasama nila Vice Mayor Junbie Samala, Congressman Jolo Revilla at mga Konsehal ng Bayan upang madama ng mga tao na wala tayong ibang nais kung hindi ang maihatid ang kagyat na serbisyong pampubliko,” dagdag pa ng alkalde.
