Pinagkalooban ng food carts ng lokal na pamahalaan ng Noveleta ang 30 benepisyaryo ng Pantawid Pamilyang Pilipino Program (4P’s) sa kanilang bayan.
Ang Tulong Puhunan Program na ito ay parte ng “Unlad Noveleta: Maunlad na Bayan na may Maunlad na Mamamayan” na naglalayong matulungan ang mga may interes sa pagnenegosyo ngunit kulang sa kapital.
Sa Facebook Post ni Noveleta Mayor Dino Chua, sinabi niyang hangad umano niya na mabigyan ng kabuhayan ang mga 4P’s member na ito sa gitna ng pandemya.
Dagdag pa ni Chua, nakatapos din umano ang mga beneficiaries sa ‘Food Cart Training’ seminar.
Nabuo ang naturang proyekto sa pagtutulungan ng Hezekiah Vocational and Technological Training Institute (HVTTI), DSWD Office at pamahalaang bayan ng Noveleta.
Pinangunahan ng alkalde ang turn over ceremony ng food carts na naglalaman ng kompletong kagamitan at paninda kasama ang mga kinatawan ng DSWD at HVTTI.
“The food carts will be deployed in different barangays,” ani Chua sa isang panayam.
