Higit 700 aso at pusa ang bininyagan at binakunahan sa Cavite Pet Festival noong Setyembre 28, kasabay ng kapistahan ni San Francisco de Assisi, patron saint ng mga alagang hayop.
Pinangunahan ni Rev. Fr. Oliver Genuino, kura paroko ng St. Francis of Assisi Parish Church, ang pagbabasbas sa mga alaga ng daan-daang pet owners na dumalo sa selebrasyon.
Kasabay ng pagbabasbas, nagsagawa rin ang City Veterinary Office sa ilalim ng pamumuno ni Dr. Gloria Digma ng mass anti-rabies vaccination bilang pakikiisa sa World Rabies Day.
“I encouraged all pet owners to be responsible fur parents. Keep your pets vaccinated, it’s free po, and don’t let your pet be stray,” ayon kay Dr. Digma.
Nagkaroon din ng parada ng mga alagang hayop na nakasuot ng makukulay na kasuotan. Nakinabang ang mga pet owners sa libreng photo booth, pet grooming, pagkain para sa aso at pusa, bitamina, at purgatives.
Namahagi rin ang lokal na pamahalaan ng eco bags, mugs, at iba pang giveaways. Bukod dito, tumanggap ang mga alaga ng baptismal certificates mula sa simbahan bilang patunay ng kanilang pagbinyag.
