Nadakip ng National Bureau of Investigation (NBI) ang tatlong lalaki kabilang ang isang opisyal ng partylist na People’s Volunteer Against Illegal Drugs (PVAID) matapos mahulog sa ikinasang buy-bust operation sa Dasmariñas, Cavite.
Ayon sa ulat ng ABS-CBN News, kinilala ng pulisya ang naaresto na si Jerklie Abdulkarim, ang itinuturong utak sa likod ng sindikatong dawit sa bentahan ng ilegal na droga at paggamit ng menor de edad bilang drug courier.
Arestado ang isang opisyal ng partylist at mga kasama nito sa isinagawang buy-bust operation sa Dasmariñas, Cavite. Photo Courtesy of Coun. Kiko Barzaga
Kinumpirma mismo ng suspek na opisyal siya ng naturang partylist pero itinanggi nito ang krimen, ayon pa rin sa parehong ulat.
Samantala, kinasuhan naman ang lahat ng suspek dahil sa paglabag nito sa Republic Act No. 9165 o Dangerous Drugs Act at dinala sa Department of Social Welfare and Development ang kasama nilang menor de edad.
Base pa rin sa ulat, magkakaroon sariling imbestigasyon ang PVAID partylist sa pagkakadawit Abdulkarim at makikipagtulungan umano sila sa NBI.
