Inatasan ng pamahalaang bayan ng Kawit ang lahat ng pampubliko at pambribadong establisyemento at mga employer na gawing requirement na ang pagbabakuna kontra COVID-19 sa kanilang mga eligible on-site na mga empleyado.
Batay sa Excecutive Order No. 037-2021, maaaring tumanggi ang mga pampubliko at pampribadong establisyemento at mga employer na papasukin o pagserbisyuhan ang mga indibidwal na nanatiling hindi bakunado.
Excecutive Order No. 037-2021. Mga larawan mula kay Mayor Angelo Aguinaldo.
Kinakailangan ng mga empleyado na maging fully vaccinated o nakakumpleto na ng dalawang dose ng COVID-19 vaccine.
Samantala, ang mga eligible na mga manggagawa na hindi bakunado ay hindi tatanggalin sa trabaho ngunit kinakailangan na regular na magpa-RT-PCR test na sarili nilang gastos.
“Sa punto pong ito, responsibilidad na nating magpabakuna kontra COVID-19 para sa ating sariling kaligtasan at ng ating #KapwaKawiteño. Inaasahan ko po na magiging responsable tayong mamamayan para na rin sa kapakanan ng lahat,” ani Mayor Angelo Aguinaldo sa kanyang Facebook post.
Dagdag pa rito, hinikayat rin ng alkalde ang mga nasasakupan nito na magpabakuna dahil ito naman ay libre aniya.
