Isinagawa ngayong araw, Mayo 4, ang isang makulay na Unity Walk na pinangunahan ni mayoral candidate Armi Aguinaldo ng Team Puso at Malasakit, katuwang ang tumatakbong 1st District Congressman na si Jolo Revilla.
Nilibot ng grupo ang ilang pangunahing lugar sa bayan bilang bahagi ng kanilang kampanya para sa nalalapit na midterm elections.
Kasunod nito, idinaos din ngayong araw ang Miting de Avance ng nasabing grupo sa Aguinaldo Freedom Park, na dinaluhan ng libo-libong Kawiteño. Ang malaking pagtitipon ay nagpapakita ng matibay na suporta ng mga mamamayan sa tambalang Armi at Angelo Aguinaldo, pati na rin sa buong hanay ng Team Puso at Malasakit.
Bilang paghahanda sa naturang aktibidad, naglabas ng abiso si Mayor Aguinaldo sa kanyang opisyal na Facebook page tungkol sa pansamantalang pagsasara ng kalsada mula Magdalo-Potol Fire Station hanggang Zeus Intersection upang bigyang-daan ang mga aktibidad ng kampanya.
“Kung ako ang inyong pipiliin, ‘di na kailangan ang mangamba, nandito kami nagmamahal sa inyo. Kung sakaling iwanan kayo ng ibang kandidato, huwag mag-alala, nandito kami nagmamahal sa inyo, Team Puso at Malasakit,” pahayag ni Konsehala Armi Aguinaldo.
Kabilang sa mga lumahok sa Miting de Avance ang 22 Punong Barangay ng Kawit, bilang patunay ng kanilang buong suporta sa tiket ng Team Puso at Malasakit, lalo na kina Aguinaldo at Revilla.
