Nagsimula nang maghanda ang Local Government Unit (LGU) ng Imus para sa A4 COVID-19 category vaccination sa kanilang lungsod.
Ayon sa Facebook post ni Mayor Emannuel Maliksi, kabilang umano rito ang mga government employees, informal sector, self-employed workers, maging ang private sector workers na nagtatrabaho sa labas ng tahanan.
Para umano sa mga nagtatrabaho sa pribado o pampublikong ahensya o organisasyon, inengganyo niya na sila’y makipag-ugnayan sa kanikanilang opisina para sa master listing.
Sila na umano ang bahalang makipag-ugnayan sa lokal na pamahalaan ng Imus para sa vaccination program rollout.
Para naman sa mga kabilang sa informal sector at mga self-employed, maaari na silang magrehistro sa bit.ly/ImusBakunaA4-IS!
Dagdag pa ng alkalde, kasama rito maging ang mga nagtitinda sa palengke, may sari-sari store, kasambahay, delivery rider at iba pa.
Maghanda rin umano ng patunay o dokumento na kabilang sila sa priority group A4 tulad ng company ID, contract o permit, certificate of eligibility (employment, deployment, assignment).
Matatandaang noong Hunyo 7 sa pagsisimula ng A4 category vaccination, nilinaw ni National Task Force Against COVID-19 deputy chief implementer at Testing czar Vince Dizon ang mga kabilang sa nasabing kategorya.
“Ang A4 po ay simple lang, lahat ng ating mga kababayan na kailangang lumabas ng kanilang mga bahay para magtrabaho ay babakunahan.”
Dagdag pa ni Dizon, itinuturing niya itong mahalagang araw para sa pamilya ng mga manggagawa at pagsisimula ng tuloy-tuloy pagbabaklas ng sakit na COVID-19.
