Tiklo ang tatlo sa limang suspek sa pagbebenta ng ilegal na droga sa ikinasang buy-bust operation sa Bacoor City Lunes ng gabi, Abril 25, matapos itong mahulihan ng halos P136 milyong halaga ng hinihinalang shabu.
Nahaharap sa kasong paglabag sa Comprehensive Dangerous Drugs Act sina Isaac Gabriel Ambulo, Roman Ambulo at Abdurrahim Ambulo.
Hindi pa napapasakamay ng kustodiya ang dalawa nilang kasama na sina Saddam Hadji Gaffor at Nabil Madarang matapos nila umanong makatakas sa nasabing operasyon.
Sa imbestigasyon ng awtoridad, ang mga naturang suspek ay kabilang sa mga supplier ng bulto-bultong halaga ng ilegal na droga sa Metro Manila, Cavite at mga karatig-lugar.
Pulis, suspek patay sa hiwalay na buy-bust
Sa bayan naman ng Tanza, patay ang isang pulis at ang tinuturong drug suspect matapos nilang magpalitan ng mga putok ng baril noong Linggo.
Ayon sa report ng mga pulis, nagtangkang tumakas ang suspek na si Leovildo Alangilan, 43, at humugot ito ng baril nang matunugan ang umiiral na drug operation.
Naglabas pa ‘di umano si Alangilan ng isang granada ngunit ito ay agad namang sumabog sa kanyang mga kamay.
Nabaril sa dibdib si Cpl. John Paul Digma ngunit siya rin ay nasawi habang ginagamot sa ospital. Dead-on-the-spot naman ang naturang suspek.
Narekober ng mga pulis ang dalawang baril, at mga sachet ng shabu at marijuana.
Thumbnail photo is a contributed photo.
