Nagpaabot ng pasasalamat si Mayor Armie Aguinaldo sa Ayala Malls Evo City at Ayala Land Inc. para sa kanilang donasyon ng bigas, bottled water, at iba pang non-perishable goods para sa mga residente ng Kawit, Cavite na apektado ng matinding pagbaha dulot ng Bagyong Emong at pinalakas na Habagat.
Personal na iniabot nina General Manager Tina de Asis at Senior Division Manager Jowell Velvez ang nasabing tulong, na direktang ipamamahagi sa mga evacuees at iba pang apektadong Kawiteño.
Bukod pa rito, nag-abot din ng relief packs ang CAVITEX Infrastructure Corporation para sa mga nasalanta. Nagbigay rin ng karagdagang suplay ng bigas sina Cavite 1st District Representative Jolo Revilla at Cavite Governor Abeng Remulla bilang suporta sa patuloy na relief operations ng lokal na pamahalaan.
Ayon kay Mayor Aguinaldo, ang mga ganitong hakbang ay patunay ng bayanihan at malasakit, lalo na sa panahon ng sakuna.
Bahagi ang mga donasyong ito ng tuloy-tuloy na relief efforts ng lokal na pamahalaan ng Kawit upang matugunan ang pangunahing pangangailangan ng mga mamamayang lubhang naapektuhan ng pagbaha.
