Suportado ng Department of Health (DOH) ang panukalang ipatupad ang 30 kilometro kada oras na speed limit sa mga urban roads. Layunin nitong mabawasan ang insidente ng mga aksidente sa kalsada — na itinuturing ngayong pangunahing sanhi ng pagkamatay ng mga kabataang Pilipino na may edad 5 hanggang 29.
Ayon kay Health Secretary Teodoro Herbosa, napatunayang epektibo ang ganitong speed limit sa ilang lugar, kabilang ang Commonwealth Avenue. Sa kabila ng mga umiiral na batas tulad ng helmet at seatbelt laws, nananatiling mataas ang bilang ng mga namamatay sa mga aksidente, kung saan karamihan ay sangkot ang mga motorsiklo.
“Maraming bansa na ang nagpapatupad nito. Sa Amsterdam, halimbawa, walang helmet ngunit may speed limiter ang bawat motorsiklo na hindi lalampas sa 30 kph,” pahayag ni Herbosa.
Batay sa datos, tinatayang nasa 70% ng mga aksidente sa kalsada ay kinasasangkutan ng mga motorsiklo.
“Road crashes are now the fifth top cause of death in the Philippines, kasunod ng cardiovascular diseases, cancer, diabetes, at pneumonia,” dagdag pa ng kalihim.
