Naaresto ang isang lalaki matapos habulin at paputukan ng baril ang kanyang live-in partner sa Barangay 29-A Caridad, Cavite City.
Sa kuha ng CCTV, makikitang tumatakbo ang babae sa eskinita habang hinahabol ng suspek. Makalipas ang ilang saglit, tinutok ng lalaki ang baril sa direksyon ng babae at pinaputukan. Ayon sa Cavite City Police, hindi tinamaan ang biktima.
Sa imbestigasyon, lumalabas na nag-ugat ang insidente sa pagtatalo ng dalawa matapos pagalitan ng babae ang suspek dahil sa malakas na pagpapatugtog habang ito’y umiinom. Tulog noon ang kanilang walong buwang gulang na anak.
Ayon sa suspek, hindi niya raw intensyong saktan ang babae at sinadya raw niyang ilihis ang putok. Hindi na nagbigay ng anumang pahayag ang suspek kaugnay sa insidente. Sa kabila nito, siya ay nahaharap ngayon sa patong-patong na kaso, kabilang ang attempted murder at paglabag sa umiiral na gun ban.
