Mariing pinabulaanan ni Kawit, Cavite Mayor Angelo Aguinaldo ang mga impormasyong umano’y ipinapakalat ng “Cavite News” na aniya’y may layuning siraan ang kanyang pangalan at pamumuno.
Sa isang pahayag na ibinahagi sa kanyang Facebook page, nilinaw ng alkalde na hindi nakatanggap ang pamahalaang bayan ng Kawit ng anumang Notice of Disallowance mula sa Commission on Audit (COA), na nagpapatunay na maayos at naaayon sa batas ang paggasta ng pondo ng bayan.
“Alam ko pong may mga mapansamantala at hindi makatao na gagawin ang lahat para sirain tayo lalo na ngayong papalapit na ang halalan. Obvious naman po no, kung sino ang nasa likod niyan lalo na sa panahong ito? Pero sana po, huwag tayong basta maniwala sa mga pekeng balita. Magtanong, magsuri, maging kritikal, at alamin ang totoo,” saad ng alkalde sa kanyang post.
Ito ay tugon sa mga alegasyon ng anomalya na ibinabato laban sa kanya, na sinasabing nagmula sa nasabing online news source.
“Ang tanging hangarin lang po natin ay paglingkuran ang bayan nang may buong Puso at Malasakit. Sa tulong ninyo, magpapatuloy tayo sa paggawa ng tama para sa Kawit,” dagdag pa ni Mayor Aguinaldo.
Ang zero disallowance mula sa COA ay nangangahulugang wala ni isang sentimo sa mga ginastos ng isang ahensya ang itinuring na iregular, hindi kumpleto ang dokumento, o labag sa batas. Sa madaling salita, lahat ng transaksyon at paggastos ng pera ng lokal na pamahalaan (LGU) ay pumasa sa mga pamantayan sa audit ng COA.
