Nahaharap sa kasong isinampa ng National Bureau of Investigation (NBI) ang apat na vlogger na umano’y responsable sa pagkakalat ng maling impormasyon na nakasisira sa tiwala ng publiko sa pamahalaan.
Batay sa imbestigasyon ng NBI, ang mga nasabing vlogger ay gumamit ng manipulatibong video kung saan binago ang orihinal na konteksto upang dayain ang publiko. Kabilang sa mga maling impormasyong kanilang ipinakalat ay ang panawagan sa mga overseas Filipino workers (OFW) na huwag nang magpadala ng remittance.
“Inisplice po nila ang video. Binago nila ang orihinal na konteksto nito at nilagyan ng caption na nagsasabing aarestuhin daw ang mga OFW. Ipinakalat nila ito upang hikayatin ang mga OFW na huwag nang magpadala ng remittance sa kanilang mga mahal sa buhay dito sa Pilipinas,” paliwanag ni NBI Criminal Intelligence Division Senior Agent Raymond Macorol.
Nagbabala rin si Macorol sa publiko na ang pagpapakalat o pagbabahagi ng nasabing pekeng video ay maaaring magresulta sa pagkakasangkot sa legal na problema.
