Patuloy na lumalakas ang kontrobersya na bumabalot kay Vice President Sara Duterte matapos ipakita ng pinakahuling SWS survey na 41% ng mga Pilipino ang pumapabor sa kanyang impeachment. Pangunahing dahilan ng suporta sa impeachment ang umano’y kuwestiyonableng paggamit ng confidential at intelligence funds ng Office of the Vice President (OVP) at Department of Education (DepEd), ayon sa 46% ng mga respondent.
Ayon sa ulat ng SWS, “46% ang nagsabing ang unexplained spending ng confidential at intelligence funds ng OVP at DepEd ang pangunahing basehan ng impeachment laban kay Vice President Duterte.”
Samantala, 35% ng mga Pilipino ang tumututol sa impeachment, habang 19% naman ang nananatiling walang desisyon. Ang pinakamalakas na suporta para sa impeachment ay naitala mula sa Class ABC (50%), sinundan ng Class D (41%) at Class E (37%).
Ilan sa iba pang isyung isinisi kay Duterte ay ang umano’y ill-gotten wealth na makikita sa kanyang SALN, ang pag-iwas niya sa mga tanong tungkol sa pondo, pagbabanta laban kay Pangulong Marcos at iba pang opisyal, at pagkakadawit niya sa extra judicial killings. Sa kasalukuyan, tatlong impeachment complaints na ang naihain laban sa Bise Presidente.
Isinagawa ang survey noong Disyembre 12-18, 2024 sa 2,160 Pilipino na may edad 18 pataas mula sa iba’t ibang bahagi ng bansa.
