Patay ang dalawang lalaki matapos malunod habang lasing sa Tanza, Cavite, at isang babae naman mula sa Dasmariñas ang nagtamo ng mga saksak mula sa isang lalaking kanyang nakasalubong.
Ayon sa ulat ng Region 4A police, sina Danilo Barquio, 50-anyos; Henry Barquio, 55-anyos; at Jemboy Perez, 25-anyos, na pawang mga residente ng Muntinlupa City, ay naligo nang lasing sa isang beach sa Barangay Capipisa.
Tinangay sila ng malakas na agos sa malalim na parte ng dagat na naging sanhi ng pagkamatay nina Danilo at Henry, habang si Perez ay nagpapagaling pa sa ospital.
Samantala, sa hiwalay na insidente, isang babae ang pinagsasaksak ng isang lalaking kanyang nakasalubong.
Nagtamo ng sugat ang babae na sana ay maghahatid lamang ng kanyang tinahing school uniform.
Batay sa ulat ng Unang Balita, makikita sa CCTV footage na ang 51-anyos na babae ay nasa Aguinaldo Highway nang masalubong niya ang hindi kilalang lalaki at bigla na lamang siyang pinagsasaksak. Nakayanan pa niyang makabangon at makahingi ng tulong, habang naharang naman ng traffic enforcer ang lalaki.
Ang biktima ay nagpapagaling na sa ospital, habang ang suspek ay nahaharap sa kasong inihahanda ng biktima.
Screengrab: Unang Balita/
