Nakiisa ang lungsod ng Bacoor bilang pilot run city ng kauna-unahang Learning Hub for Enhanced and Revitalized Nutrition (LHEARN) program.
Hinirang na pilot run city ang lungsod ng Bacoor para sa LHEARN program na pinangunahan ng lungsod ng Tagaytay sa tulong ng National Nutrition Council (NNC) CALABARZON at ng ALCANZ International.
Ito umano ang kauna-unahang LHEARN program sa buong Pilipinas na layong masugpo ang problema sa malnutrisyon.
Ayon kay Bacoor City Mayor Lani Mercado-Revilla, “Bilang isang punong lungsod, naniniwala ako na ang pag-alaga at pagtaguyod sa kalusugan ng mga mamamayan, partikular ng mga kabataan, mula sa sinapupunan pa lamang hanggang sa kanilang paglaki, ay isa sa most essential and indispensable elements sa pagpanday ng isang maunlad na kunabukasan para sa lahat.”
Dagdag pa rito, binigyang pansin rin ng naturang alkalde sa pagkakaroon ng matibay na resistensya sa pamamagitan ng pagbabakuna kontra COVID-19.
“Kasi di lang malnutrition ang ating kalaban ngayon- andiyan ang COVID-19…Bilang isang Ina sa aking mga anak at sa buong Lungsod ng Bacoor, aking sinisiguro na ligtas ang lahat ng mga Bacooreno lalo ang mga kabataan sa mga sakit na pwedeng dumapo sa kanila,” aniya.
“Ang pagiging nanay ay pagsiguro na may maayos na tahanan ang aking mga anak. Gayun din ako bilang Punong Lungsod o nanay ng mga Bacooreño. Puspusan ang ating mga programa kaagapay ang City Nutrition Council, DOH Region 4A at National government,” dagdag pa ni Revilla.
