BACOOR CITY – Nabakunahan na ang 3,077 frontline workers kontra COVID-19 sa lungsod ng Bacoor noong Marso 27.
Sa isang Facebook post ng City Government of Bacoor, sinabi nito na kabilang sa mga nabakunahan na ay ang mga healthcare workers na nagtatrabaho sa mga pampribadong klinika, social workers, contact tracers, jail officers at personnel at mga miyembro ng Barangay Health Emergency Response Teams (BHERTS).
Inaasahan naman sa Martes, Marso 30, na magsisimula na pagbabakuna sa mga senior citizen sa naturang lungsod.
Dagdag pa rito, inanunsyo rin ng lokal na pamahalaan ng Bacoor na makipag-ugnayan sa mga barangay para sa pagrerehistro online gamit ang Barangay E-Governance and Information Network (BEGIN).
Ang BEGIN ay isang digital na sistema ng mga barangay na inilunsad ng naturang pamahalaang lungsod sa pangunguna ni Bacoor City Mayor Lani Mercado-Revilla noong Marso 3 para sa mga nais magpabakuna kontra COVID-19.
Bukod pa rito, magagamit din ang BEGIN sa mga operasyong pangkalamidad, pagpapatupad ng National ID system at iba pang serbisyo para mga Bacooreño.
