Mariing itinanggi ni Cavite City Mayor Denver Chua ang anumang kinalaman sa umano’y isyu ng vote buying, matapos siyang makatanggap ng show cause order mula sa Commission on Elections (COMELEC). Iginiit ng alkalde na hindi siya kailanman nasangkot sa anumang iregularidad at palagi niyang sinusunod ang mga alituntunin ng COMELEC.
Ipinaliwanag ni Chua na tumatakbo siya nang walang kalaban sa halalan, kaya’t wala siyang motibo o dahilan para gumawa ng anumang uri ng pandaraya. Aniya, prayoridad niya ang pagsunod sa batas at ang integridad ng halalan upang mapanatili ang tiwala ng mamamayan sa pamahalaan.
Naniniwala si Chua na ang reklamong inihain laban sa kanya ay bahagi lamang ng maruming pulitika ng ilang indibidwal na naglalayong guluhin ang maayos na pamamahala sa Lungsod ng Cavite.
Iginiit niya na sa halip na siraan ang kasalukuyang liderato, mas nararapat na pagtuunan ng pansin ang pagpapalakas ng mga programa at proyekto na tunay na nagpapabuti sa buhay ng kanyang mga nasasakupan.
“Patuloy nating itaguyod ang pagkakaisa, kaunlaran, at katotohanan sa ating lungsod. Sa tulong ng bawat Caviteño, magpapatuloy ang Unlad Cavite City,” pahayag ng alkalde.
